Jurawanderig über d Lägere

Ob ächt dr Reinhard, wo sech jo sit Monet für üsi Rothornhütten ysetzt (wo Dank dr Sektion Lägere (!) jetz cha realisiert wärde) us däm Grund grad äbe die Wanderig usgsuecht het ?...
Item ….
Für fasch aui Teilnämer isch dä öschtlechscht Jura-Usläufer unbekannt gsi, und so hei mer scho in Dielsdorf ab de wunderschöne Riighüser gstuunet. Du isch es dür Räbgebiet bis Regensberg ufe gange: es wunder-hübsches, mittuauterlichs, ovals Stettli mit beschtens erhautene Hüser und dominiert vom runde Turm.  D Nachkomme vo de Freiherre vo Regensberg si offebar no hüt sehr wohlhabend ! Dr Wäg het üs dür Buechewäuder mit zart-grüenem Loub wyter gfüert bis zur Hohwacht, wo mer einersyts di tolli Ussicht übers Land gnosse und anderersyts di ganze technischen Aalage vo SkyGuide gseh hei: d Lägere isch e ganz e wichtige Punkt für d Flugzüüg vo und nach Züri/Klote. Übers Gratwägli si mer zum höchschte Punkt cho und hei beidsyts vom Grat no einisch über d Kantön Züri und Aargou gluegt, bevor mer nach Baden abe gloufe sy. Aber haut: es het no einisch en Überraschig gäh: zwar hei mer ganzi 77 Stägetritt wider müessen ufstyge, du hei mer aber am ene usgsuecht schönen Ort no chönne gemeinsam dr gross Durscht lösche: vom Schloss Schartenfels het men e grossartigi Ussicht über d Stadt Bade ! E stotzigen Abstig - churz dr Limmat no - und scho si mer bim Bahnhof gsi.
Reinhard und Brigitte: im Name vo de 9 Teilnämer danken i euch für di tolli und beschtens vorbereiteti Wanderig in es unbekannts Gebiet.                                                             Annette