Apéro Hällchöpfli
30. April 2023

Wi gäng um die Zyt vom Früelig findet ou hüür wider s Apéro uf em Hällchöpfli statt !
Dr Petrus isch is gnädig: ke Räge, chum Wind, agnämi Tämperatur.
Di 25 SAC-ler (s meischte Seniore) chöme us aune Richtige gäge s „Chöpfli“ z loufe: vor Schwängimatt, vor Buechmatt, vor Hingeregg, etc., und punkt 11i (dr „Tisch“ isch parat mit aune guete Sache druf) fot dr Senioren-Obmann Toni a, dr Wy yzschänke. D Stimmig isch guet, me cha Späckzüpfe, Chäs und Wurscht schnouse und mit em einte oder angere es paar Wort wächsle.
I dr Buechmatt empfoht üs d Margrit. Zäme mit dr Silvia und em Fritz hei si es grossartigs Mittagässe härezouberet – näbscht dr Tischdekoration und vüune chlyne Ufmerksamkeite.
Bi agregte Gspräch geit d Zyt im Hui verby, und scho si aui wider am ufbräche – bevor di nächschti Schütti derhär chunnt.
E grosse Dank dr Seniore-Kommission, wo hoffentlech di schöni Tradition no lang wyterfüehrt.

Annette Ramseier

Fotos: Elsbeth Schenk, Roli Christen, Reinhard Hasler, Margrit Meier, Dora Eggenschwiler