Dört wo färn d Etappe 4 ufghört het, hei mer üs hür wider zum Start parat gmacht: in Grandfontaine. Dr Kobi het di 'bekannte' Ajoie-Wanderer + zwöi Nöji chönne begrüesse. Hüt hei mer en überus abwächsligsryche Wäg gha: vüu dür e Waud - teils licht, teils dicht - was wägem Schatte sehr willkommen isch gsi. Dr 'Gränzgänger-Pfad' hets no in sich gha: ufe / abe / mängisch stotzig / mängisch dür d Jurafelse düre / romantisch / aber gäng (!) de Gränzsteine noh: wi mänge hei mer ächt gseh?... In Roche d' Or, wo mer übernachtet hei, hei mer e ganz e wunderschönen Oben erläbt: e Wytsicht über di ganzi Ajoie nach Frankrych übere und bis zu de Vogese. D Sunne isch sage und schreibe erscht am haubi zähni ungergange. Und dass men es auts Schueuhuus eso zu nere Pension cha umfunktioniere muess me zerscht erläbt ha !...
Ou dr zwöit Tag het üs vüu bbotte: mir si lang, lang überne offne Höhezug gloufe und hei di tolli Ussicht gnosse: dr Chasseral het wi ne Lüchtturm zu üs übere grüesst. Du isch es nodisnoh wider i Waud und z dürab is Tau vom Doubs gange. Churz bevor mer in St. Ursanne ydrudlet si, het üs üses morndrige Geburtagsching zu nere willkommene 'Rundi' yglade.
Kobi: mir aui danke dir vüumou für dini umsichtigi und agnämi Füerig und …. dass mer aui vo dim bsungere Droht zum Petrus hei chönne profitiere: insgesamt 6 Tag gäng schön und warm!
Annette
