Touren  Berichte  Login ?

Rundtour Fiescheralp 14. August

E ganz e schöni, churzwyligi und gnussrychi Wanderig im grossartigen  Aletschgebiet het sech dr Roli Christen usdänkt: vor Fiescheralp übere Tälligrat, wo mer … wuau ! … zum 1. Mou ufen Aletschgletscher abe gseh hei und wyter via Märjelesee bis uf Platta. Uf deren Ussichtskanzle höch überem majestätischen  Aletschgletscher hei mer es Momäntli chönne verwyle und die bombastischi Gägend uf üs lo ywürke…. Bis ufe zur Konkordiahütte hei mer gseh und verschideni Gruppe wo dr Gletscher zdürab gwanderet si.
Wo dr Ruedi Ho. mit sire sametige, voluminöse Stimm wider (wi scho uf em Tälligrat) es paar Lieder vortreit het, wo zu dere grandiose Gägend passt hei, isch es mängem vo üs übere Rüggen ab tschuderet, so hets eim ir Seel wohl to.
Mir si zrügg via Märjelesee - unners Tälli (herrleche Blick uf e Fieschergletscher!) - uf d Fiescheralp.
Vile Dank, Roli, für di tolli  Wanderig im UNESCO-Kulturerbe!                                    
Annette