Vor 5 Johr si mer scho im Pflerschtal gsi und hei die Schii-Tuurewuche no i beschter Erinnerig: wunderschöne Pulverschnee und es heimeligs Hotel.
Und letscht Johr si mer (wätterbedingt) ei Tag vo dr Nord-Site vom Brenner uf d Süd-Site usgwiche und hei wider im Pflerschtal e tolli Tuur chönne mache. Denn hei mer natürlech „üsem“ Hotel es Bsüechli abgstattet, wo mer e so härzlech begrüesst worde si, dass es hüür äbe Pflerschtal 2 gäh het. Tuuremöglechkeite git es do umenang gnue, dass me problemlos e zwöiti Tuurewuche cha dürefüere.
Schnee het’s ou hüür i grosser Mängi gäh, und di zwe erschte Tag hei mer dä locker Pulver chönne gniesse. Du isch aber e heftige Sturm-Wind cho, wo riisigi Schneeverfrachtige zur Folg het gha und … dr schön flockig Pulver zämepresst het. Hingäge hei mer vom Mittwoch a kei Wulke me am Himu gseh!
Üsi Tuure si gsi:
- Pflerschtal: Pfaffenberg 2074 m, Pfannbeiljoch 2528 m
- Ratschingstal: Fleckner 2331 m, kleine Kreuzspitze 2518 m
- Riednauntal: Zunderspitze 2445 m
- Jaufental: Zinseler 2422 m
Annette
⇐