Bi dr Bus-Hautstöu „Iffigefäu“ oberhaub dr Länk, wo natürlech riiisigi (!) Wassermasse abe donneret si, hei mer afo loufe, und d Hitz a däm 27. Juni het üs aune meh oder weniger z schaffe gmacht.
Du si mer aber nodisno e chl …weiterlesen

Bi dr Bus-Hautstöu „Iffigefäu“ oberhaub dr Länk, wo natürlech riiisigi (!) Wassermasse abe donneret si, hei mer afo loufe, und d Hitz a däm 27. Juni het üs aune meh oder weniger z schaffe gmacht.
Du si mer aber nodisno e chli höcher und i licht Waud cho, und dört hei üs d Blueme di ganzi Hitz lo vergässe: e Bluemepracht, wi me se säute fingt! Di ganzi Palette vo Bärgblueme het’s dört gha, eso früsch und chäch hei si eim agstrahlet! Uf em Iffigehorn 2378 m hei mer di tolli Rundumsicht bimene agnäme Lüftli gnosse. Abstieg gäge Iffigesee und Ufstieg meischtens über Schneefäuder zur Wüudhornhütte, wo mer beschtens ufghobe si gsi.
Am angere Morge si mer bezyte, d.h. wo’s no chüeu isch gsi, wider zdürab gäge See gloufe und vo dört Richtig Tungelpass. Uf de Matte het me sech chum getrout abztrappe, sövu Blüemli het’s gha! En unsagbari Diversität: vo de erschte Soldanelle über aui Früeligsblueme bis zu dr summerleche Auperose! Dr Abstieg gäge Tungelpass het Ufmerksamkeit erforderet, aber aui hei di rächt steile Schneefäuder und de ou dr versicheret Abstieg im Föus prima gmeischteret. Vo dört bis zum „Leiterli“ vüre si d Fotografe no einisch vou und ganz uf ihri Rächnig cho !
Im Name vo aune 14 Teilnämer danken i am Ruedi ganz härzlech für di tolli Wanderig – s Rekognosziere zwe Tag vorhär het sech glohnt !
Annette