Üsi hüürigi Unterkunft hätt nid besser chönne sy: erschtens isch’s Bärgstiger-Hotel „Lamm“ es dänkwürdigs Huus, wo me gschichtlech bis 1300 zrügg cha verfolge, und zwöitens het me vo St. Jodok / Vals us i aune Richtigen u …weiterlesen

Üsi hüürigi Unterkunft hätt nid besser chönne sy: erschtens isch’s Bärgstiger-Hotel „Lamm“ es dänkwürdigs Huus, wo me gschichtlech bis 1300 zrügg cha verfolge, und zwöitens het me vo St. Jodok / Vals us i aune Richtigen ume Tuuremüglechkeite.

Mir hei die „Figgen und Müli“-Situation de ou usgnützt und si zerscht vo Padaun im Valsertal us uf d Vennspitze (2390 m), wo mer e tolli Rundsicht vo de Zillertaler bis zu de Stubaier Bärge gnosse hei. Vom Navisertal hei mer du s Naviser Kreuzjöchl (2536 m) bsuecht: e würdige Gipfu für ne dänkwürdigi Picku-Übergab!!.... Wüu am Mittwuch s Wätter bi üs nid würkli guet, im Süde hingäge wunderschön isch gsi, sy mer churzentschlosse übere Brenner is Pflerschtau gfahre, wo mer aui no i beschter Erinnerig hei vor schneeryche Tuurewuche 2014. Dört hei mer dr Speikkofel (2410 m) bsuecht, wo offebar chuum begange wird: mir si wytumenang die einzige Tüüreler gsi und hei ou keni aute Spuure geseh. Tags druf si mer vom Obernbergtal (weschtlech vom Wipptal) uf e Grubenkopf (2309 m); dasch di einzigi Tuur gsi, wo mer bi dr Abfahrt diffuses Liecht hei gha. Aber mir sin üs du bi dr „schönst gelegenen Kirche Tirols“ in Obernberg go tröschte. Dr Fryti, üse letscht Tag, isch dr absolut Hammer gsi: vo Brennerbad us, d.h. grad südlech vo dr Passhöchi, si mer bi strahlendem, warmem Wätter uf d Flatschspitze (2566 m): düre Waud uf isch es zerscht e chli es Knorz gsi, aber du si mer i di offne Häng cho, und aui hei sech scho uf d Abfahrt gfröit!... Dr Gipfu het me sech müesse mit ere Traverse (z Fuess) vom e ne nätte Grätli verdiene, und gly nachhär het’s nume no gstobe: 800 HM Abfahrt dür fynschte Puder – jede het sini eigete Spuure hingerlo, und aui hei nume no gjuchzet vor Fröid! Mir hei jo di ganzi Wuche eigetlech guete Schnee gha, aber die Abfahrt do ischs absolute Tüpfli uf em i gsi und blibt sicher jedem Teilnämer vo üsere tolle Schii-TW no lang ir Erinnerig.

Vile Dank, Ruedi, für die wi gäng tiptop organisierti Schii-Tuurewuche ! Du hesch hüür e ganz e guete Droht zum Petrus und zur Frou Holle gha.
                                                                                                                                             Annette