Was het ächt dr Ruedi für ne bsungere Droht zum Petrus, dass mir bi 4 strahlende (!) und eim guete Tag üsi Wanderige hei chönne gniesse? Und das im „Summer“ 2014 !!...
Scho am Sunntimittag si mer uf e Col Ouest de Barasson 263 …weiterlesen
Was het ächt dr Ruedi für ne bsungere Droht zum Petrus, dass mir bi 4 strahlende (!) und eim guete Tag üsi Wanderige hei chönne gniesse? Und das im „Summer“ 2014 !!...
Scho am Sunntimittag si mer uf e Col Ouest de Barasson 2635 m, wo mer – wau! – zum erschte Mou dr Mont Blanc, d Grandes Jorasses etc. gseh hei. Ou am Mänti het üs d Sunne früeh zum Bett us glockt, und do si mer is Val Ferret gfahre und vo La Fouly us bi de herrleche Seeli verby übers Fenêtre de Ferret 2698 m bis uf di italiänischi Syte vom Pass und de wider „hei“ zum Hospiz gwanderet. Am Zyschti, uf em Wäg übere Col des Chevaux 2714m hein üs houptsächlech dr Grand Combin und dr Vélan begleitet – stouzi Bärge! Und du hei mer dr Chlättersteig über La Grande Chenalette 2890 m und Pointe de Drône 2950 m gmacht: es grosses Vergnüege für aui, ou we mer üs bim z.T. sehr stotzigen Abstieg gäges Fenêtre d’en Haut unerchant hei müesse konzentriere. Dört hei mer du lang enere riesige Steibock-Kolonie chönne zueluege, bis sen es Kamuff vom ene Tourischt isch go verschüüche. Am letschte Tag hei mer uf em Mt. Fourchon 2902 m no einisch s ganze Panorama vom Mt. Blanc, Grandes Jorasses übere Mt. Dolent und bis zu Combin, Vélan, etc. chönne bestuune.
E Hampfelen Oberaargouer kenne jetz di gschichtsträchtigi Gäged vom Grosse St. Bernhard guet und wärde sech noch lang a di troumhafte Tage dört oben erinnere, i dere ruuche und doch schöne Bärgwäut.
Annette
⇐