Troumverhältnis im Pflerschtal

Nach emene miggerige Winter, wo eigentlech gar kene isch gsi, und den ewige Föhn- und Schlächtwätterybrüch si mer …weiterlesen

Troumverhältnis im Pflerschtal

Nach emene miggerige Winter, wo eigentlech gar kene isch gsi, und den ewige Föhn- und Schlächtwätterybrüch si mer mit meh aus nume gmischte Gfüeu is Pflerschtal losgfahre. Wo isch das überhoupt?... Grad südlech vom Brenner s erschte Tal gäge Weschte.

Und dört hei mer e geniali Wuchen erläbt: märlihaft verschneiti Wäuder, drüber riesigi wyti offeni Häng mit Troum-Pulver und das Ganze bi rächt guetem Wätter. Churz: ändlech Winter !

Am Bodnerberg 2372 m hei mer wäge z vüu Schnee müessen uf e Gipfu verzichte, aber s Pfarmbeil-joch 2528 m isch e rassigi Tuur gsi mit Pulverschnee, wi me ne nume au 10 Johr erläbt. Und de s Hühnerspiel 2748 m mit sire Rundum-Sicht!... Die het me sech allerdings zerscht mit emene Ufstieg vo 1400 HM müesse verdiene, woby z sägen isch, dass 40% vo de Teilnämer zwüsche 70 und 80i si gsi!! Di Kleine Kreuzspitze 2518 m  vom Ratschingstal us (bi stahlblauem Himmu!) und di längi Super-Powder-Abfahrt vo dr Maurerscharte 2511 m (Gheimtip vom Reinhold) blyben ou unvergässlech, genau wi dr Bsuech vo Sterzing und di nächtlechi Schlittenabfahrt.

Ruedi – du hesch’s wider breicht! Aues het gstimmt!! Und ou di tolli Kameradschaft und di einmaligi Harmonie i dr Gruppe hei derzue bytreit, dass me di Tuurewuche chum me cha „toppe“. Vile härzleche Dank!

Annette