Fürs grad vornewäg z näh: am Sunnti und am Mänti vo dere Wuche isch dr Himmu no rächt bedeckt gsi (kei Räge!), die räschtleche Tag hei mer eifach nume schön und warm gha!
Für en erscht Tag het sech dr Ruedi e Wanderig um Simp …weiterlesen

Fürs grad vornewäg z näh: am Sunnti und am Mänti vo dere Wuche isch dr Himmu no rächt bedeckt gsi (kei Räge!), die räschtleche Tag hei mer eifach nume schön und warm gha!
Für en erscht Tag het sech dr Ruedi e Wanderig um Simplon-Dorf usdänkt: mir si über s Tau vom Senggibach und bis Rossbodestafel gloufe, wo mer leider wäge der schlächte Sicht hei müessen umchehre. Am Nomittag hei mer no der Panorama-Wäg oberhalb vo „üsem“ Dorf abgloufe.
Am Mäntig si mer dür die imposanti Gondoschlucht gwanderet und hei e Füehrig dür d Feschtig vom 1. Wäutchrieg gha. Mir si be-indruckt gsi, was dr Herr von Stockalper,  dr Napoleon und üsi Vorfahre i dere Gägend aus gleischtet hei!...
Dr Zyschti het üs e sensationelli Ussicht bzw. Rundsicht vom Spitzhorli 2726m us botte, und em Mittwuch si mer (wider vom Simplon-Pass us) i d Monte Leone Hütte 2848m ufe gloufe: e troumhafte Hüttewäg!
Tags druf si mer i Bistinepass 2417m gwanderet, wyter übere Sirwoltesattel 2621m zum glychnamige See und de via Wyssbodehorn 2623m über ne Höhewäg mit grossartiger Ussicht bis Egga und Simplon-Dorf zrügg.
Dr letscht Tag het üs vo Gabi über Furggu 1872m ufs Seehorn 2438m gfüert und abe is Zwüschbärgetau.
E guet vorbereiteti, guet gfüehrti Wanderwuche bi tollem Wätter und wunderschöner  Kameradschaft !   
Annette