Aller guten Dinge sind drei !... Bim dritten Alouf isch es em Roli Christen ändlech glunge, die fantastischi Wanderig dürezfüere.
Vo Vrin/Puzzatsch us si mer uf e Pass Diesrut gloufe. … W A U !! het’s gmacht, wo mer die ganzi Greina-Äbeni unger üs gseh hei! Mir hei se der Lengi no dürwanderet und eso di fasch surreali Schönheit vo dere karge Landschaft chönne erläbe. Übere Passo della Greina si mer id d Scaletta-Hütte cho. Der anger Tag isch d « Königsetappe » gsi : übere Steibockwäg i d Bovarina-Hütte. Dr Roli het gwüsst, worum dass er dr ganz Tag e chli „zoge“ und nume churzi Pouse gmacht het: chuum si mer bir Hütten acho, het’s agfange donnere und di erschte schwäre Rägetropfe hein üs ine tribe. Dr dritt Tag isch aber wider schön sunnig derhär cho und mir hei s „Dessär“ vo dene 3 Täg gmüetlech chönne dürwandere und gniesse: über d Alpe di Bovarina (2 Herde à öppe 130 Chüe bzw. Rindli) und übere Passo di Gana Nero uf e Lukmanier, wo’s ou just denn agfange het tröpfele, wo mer d Ruckseck abzoge hei!...
Im Name vo aune 8 Teilnämer sägeni „tuusig Dank“ am Roli für di ganze Vorbereitige und di umsichtigi Füerig.
Annette
⇐
